بوظة كريمية

بوووووووظة 

وصفتي اليوم مانا بوظة عربية هي البوظة الاقرب للكريمة يلي منطعميها للاولاد عأساس انو برودتها اخف وميزتها كمان انو ما بيتشكل فيها بلورات تلج لذلك ما بدها تحريك
المقادير
1_2علبة كريمة سائلة وزن 200 مل العلبة الوحدة
2_ظرف كريمة بودرة وزن 75 غ
3_علبة قشطة صغيرة وزن 125 مل
4_فنجان قهوة حليب مكثف محلى 

طريقة التحضير 
نضع المقادير بخفاقة الكيك وليس الخلاط ونخلط حتى يتضاعف حجم الكريمة وتسمك .
اذا حبيتي تتركيها هيك ضيفي ملعقة فانيل صغيرة واخفقيها  واذا حبيتي تنكهيها متل ما عملت حطي رشة فانيل صغيرة بس واقسمي الكمية وبلشي بالنكهات
انا عملت بنكهة الموز خلطت موزتين بالخلاط مع ملعقة عسل ورشة كاكاو وبعدين اخدت قسم من البوظة وخلطتو مع الموز ولكن بالملعقة وبتحطيها بعلبة وعالفريزر
النكهة التانية موكا اخدت قسم من البوظة وخلطت معو ملعقة نسكافيه وربع ملعقة كاكاو
وقسم ع فريز خلطت الفريز بالخلاط وكمان ضفتو على قسم من البوظة
وقسم ع شوكولا ضفتلو ملعقتين كاكاو وخلطتو .
وبتحفظيها بعلبة مغلقة بالفريزر 5 او 6 ساعات وبتكون صارت جاهزة تمام
والصور اكبر دليل
والزينة كيف بدكن بتزينوا انا زينت  بصوص شوكولا
وصوص فريز جاهز
فيكي تبرشي شوكولا وفيكي تزيني بالمكسرات او بصوص كراميل على راحتك الخيارات كتيرة